વેલકમ ૨૦૧૧

નવું વરસ ૨૦૧૧ બધાને ખુબ ફળે. તન, મન, અને ધનની શાંતિ આપે. આ કોઈ આશીર્વાદ નથી, આશાવાદ જરૂર છે.

ગયા વરસમાં કેટલા હુલ્લડ થયા, કેટલી હોનારત થઈ, કેટલા કૌભાંડ થયા, કેટલા હુમલા થયા, કેટલા હોમાયા વગેરેપર લખવાનું કામ છાપાવાલાઓનું છે અને એ ફરીથી બધા ફોટાઓ છાપીને તમને યાદ પણ કરાવ્યું હશે. પણ આપણે નવી આશાઓ પર અને કેટલીક ૨૦૧૧ને લગતી માહિતી પર લખીએ તો ? ( કોણ બોલ્યું, લોકો કોપી કરે..!) ફિલ્મ (આ  પોસ્ટ) ફ્લોપ ભલે જાય, પણ બે વાત જાણવા તો જરૂર મળશે.

ચાલો જોઈએ કેટલીક રસપ્રદ(interesting) ઘટનાઓ જે ૨૦૧૧મા બનશે!

સૌ પ્રથમ ૨૦૧૧ એ અવિભાજ્ય સંખ્યા છે. ( કોણ બોલ્યું, એટલે ભારે રહેશે ? જરૂર કોઈક સિન્ડ્રોમની અસર ) ૨૦૦૫, ૨૦૧૧ અને ૨૦૨૨ આ ત્રણેય સૌથી નજીકના એવા વરસો છે જેના અંગ્રેજી કેલેન્ડર એકસરખા છે.  ( છેલ્લાં  ૯૦  વરસોમાં આ કેલેન્ડર ૧૧ વખત રીપીટ થયું છે !)

કેટલીક રસપ્રદ તારીખો ૨૦૧૧ના વરસની. ( તારીખો વિશેની જૂની પોસ્ટ્સ ૨૦૦૮/૦૮/૦૮અને વર્ગમૂળ દિવસ )
૧) માત્ર એકડાઓવાળી તારીખો. ૧/૧/૧૧, ૧/૧૧/૧૧, ૧૧/૧/૧૧, અને ૧૧/૧૧/૧૧.  ( આવો છ સરખા કોઈ પણ  આંકડા તારીખમાં આવવાનો સુભગ સંયોગ છેક ૧૧/૧૧/૨૧૧૧ સુધી જોવા નહિ મળે, મતલબ આપણને જોવા નહિ મળે! )
૨) અને લો આ બે પાક્કી રોન:  ૯/૧૦/૧૧ - નૌ દસ ગ્યારહ- અને ૧૩/૧૨/૧૧.
3) ૨૦/૧૧/૨૦૧૧   ( ૨૦૧૧ ૨૦૧૧ )
૪) પોઈન્ટ નંબર ૧) વાળી બધી અને દર મહિનાની ૧૧/૨/૧૧, ૧૧/૩/૧૧, ૧૧/૪/૧૧ ...૧૧/૯/૧૧ :  આગળ અને પાછળથી  વાંચતા સરખી (palindrome) છે.

૫) ૫/૭/૧૧ - ક્રમિક અવિભાજ્ય સંખ્યાઓ !
૬) ૭/૯/૧૧  - ક્રમિક અયુગ્મ  સંખ્યાઓ.

હવે કેટલીક ૨૦૧૧મા   થનારી રસપ્રદ ઘટનાઓ. (સોર્સ: વિકિપીડિયા, આ વરસે મંદિરે ૧૦૦ રૂપિયા ના મુકતા કે ઓછા મૂકી આમને દાન આપો તો કેવું?  [સાચો જવાબ:  લેખે લાગે.]  )

૧) ૧લી જાન્યુઆરી એ કોમ્પ્યુટરનો Y1C પ્રોબ્લેમ ચીનને કનડશે.
૨)  ૯ જાન્યુઆરી દક્ષિણ સુદાનની આઝાદી માટેની મહત્વપૂર્ણ મીટીંગ.
૩)   ન્યુ હોરાઈઝોન્સ પ્રોબ પાંચ વરસ બાદ માર્ચ ૧૮મીએ પ્લુટોની ભ્રમણ કક્ષા ભેદશે અને એ જ દિવસે મેસેન્જર સ્પેસક્રાફ્ટ બુધની કક્ષામાં પ્રવેશશે.

૪) બીજી અપ્રિલે ક્રિકેટ વર્લ્ડ કપની  મુંબઈમાં ફાઈનલ.
૫)પાકિસ્તાન એનો પ્રથમ સ્પેસ સેટેલાઈટ એપ્રિલમાં તરતો મુકશે.
૬) મેં મહિનામાં મંગળ, બુધ, ગુરુ અને શુક્ર ગર્હો માત્ર ૬ ડીગ્રીના અંતરે આવશે.
૭) ૧૦ જુલાઈના રોજ નેપચ્યુન  એની ભ્રમણકક્ષામાં  ચક્ર પૂરું કરશે. ૧૮૪૬મા નેપચ્યુંનની ડીસ્કવરી પછી આ તેનું પહેલું સંપૂર્ણ ભ્રમણ છે.
૮) ઓગસ્ટ ૧૫મીના રોજ   ધૂમકેતુ 45B પૃથ્વીની નજીક આવશે.
૯) ipv4 ( ઈન્ટરનેટ પ્રોટોકોલ )ના બધા એડ્રેસ આ વરસે વપરાઈ જશે.
૧૦)  આ વરસ ઇન્ટરનેશનલ જંગલ અને ઇન્ટરનેશનલ કેમિસ્ટ્રી વરસ તરીકે યુનોએ જાહેર કરેલ છે.

હવે આખું વરસ આ બધા સમાચારો છાપાઓમાં કાં  તો  તમે ફરીથી સહન કરવાનું નહિ વિચારો અથવા  વધુ રસથી  આખું વરસ વાંચતા રહેશો !

Dholavira - Kutchh (ધોળાવીરા )

અત્યાર સુધીમાં માણેલ ગુજરાતી વીડીયોમાં કદાચ ક્ષેષ્ઠ વીડીયો હશે... પુરાતન સ્થળ ધોળાવીરા વિષે ખુબ જ સરસ ક્લિપ્..

બિઝનેસ કિસ્સાઓ – વનરાજ માલવી

આઈ.બી.એમ કંપનીના ટોચના એક અધિકારીએ કશીક ભૂલ કરી. તેથી કંપનીએ સાઠ હજાર ડૉલરનું નુકશાન ભોગવવું પડેલું હતું. એટલે તેના ચૅરમેનને કોઈકે પૂછ્યું : ‘તો તમે એને કંપનીમાંથી બરતરફ કરશો ?’
વૉટસને જવાબ આપ્યો : ‘ના, મેં તેને ગફલત દ્વારા શીખવા માટે ને કીમતી અનુભવ લેવા સારુ 60,000 ડૉલર હમણાં જ ખરચ્યા છે. તો એના એ અનુભવનો લાભ હું બીજી કંપનીને શા માટે લેવા દઉં ?’

*****

અમેરિકામાં બે ધરખમ કંપનીઓ તેઓ સમાનપણે પ્રકાશન પ્રવૃત્તિમાં લગભગ આગળ પાછળના સમયમાં દાખલ થયા. એમાંની એક કંપની હતી ટાઈમ ઈન્કોર્પોરેટેડ. તેમણે શરૂઆત કરી ટેકનિકલ વિષયના પ્રકાશનથી. તેમાં તેઓ ફાવ્યા નહિ. આખરે થયું કે લોકોને સમાચારમાં ખાસ્સો રસ પડે છે. એટલે વિશ્વભરના દેશોના સમાચારને આવરી લઈ તેને લગતું મેગેઝિન શરૂ કર્યું. અને તેમાં તેઓ ખૂબ ખૂબ સફળ નીવડ્યાં ને દુનિયાભરમાં જાણીતા થયા.
તો બીજી કંપની હતી મૅકગ્રો હિલ – તેમણે જ્યાં ટાઈમ નિષ્ફળ નીવડેલું તે જ ક્ષેત્ર પકડ્યું. તેમણે વિશ્વના સમાચારોને આવરી લેતું સામાયિક શરૂ કર્યું. તેમાં તેઓ ફાવ્યા નહિ એટલે ટેકનિકલ વિષયોની માહિતીને આવરી લેતા મેગેઝિન શરૂ કર્યાં. અને સારી પેઠે સફળતા મેળવી ! કેવી નવાઈની વાત ! એ કંપની ગમે તે પગારથી ઉત્કૃષ્ટ શક્તિવાળા માણસોને નોકરીમાં રાખતા છતાં જ્યાં એક કંપની નિષ્ફળ ગઈ ત્યાં બીજીને સફળ થવામાં કોઈ તકલીફ ન પડી !

***

સાબુના એક પરદેશી ઉત્પાદકે આરબ દેશોમાં પોતાનું બજાર વિકસાવવાનું ઠરાવ્યું. ત્યાંના પ્રચાર માટે તેમણે પોસ્ટર છપાવ્યાં. એમાં એકની અડોઅડ બીજું, અને બીજાની અડોઅડ ત્રીજું એમ ત્રણ ચિત્રોની જાહેરાત તૈયાર કરાવી.
પહેલા ચિત્રમાં મેલાં થઈ ગયેલાં કપડાંનો ઢગલો બતાવ્યો. પછીના બીજા ચિત્રમાં એક ડોલમાં, પાણીમાં જે તે સાબુનો ભૂકો નાખી તેમાં મેલાં થયેલાં વસ્ત્રોને ડબોળતાં બતાવ્યાં. અને ત્રીજા ચિત્રમાં એ ડોલમાંથી બહાર કાઢેલાં ચોખ્ખાં ને ધોળાબંધ થયેલાં વસ્ત્રો બતાવ્યાં.
એ જાહેરાતનાં પોસ્ટર ઠેકઠેકાણે ચોંટાડાવ્યાં. ને તેના પરિણામની રાહ જોવા માંડી. પણ તે જોઈને, એ સાબુ ખરીદવા માટે કોઈ ગ્રાહક ફરક્યો જ નહિ ! તેમને વિસ્મય થયું ! આપણી આ જ જાહેરાત બીજા દેશોમાં ખૂબ સફળ નીવડી છે. સાબુની ખપત ખાસ્સી વધી છે. તો અહીં તે નિષ્ફળ કેમ ગઈ ? તેઓ એનાં કારણોમાં ઊંડા ઊતર્યા. ત્યારે એનું રહસ્ય ખુલ્લું થયું. આ તો આરબ દેશ છે. તેઓ અંગ્રેજી ભાષાની માફક ડાબેથી જમણી તરફ વાંચતા નથી; પણ તેમની પ્રણાલિ (ઉર્દુ) પ્રમાણે જમણેથી ડાબી તરફ નજર જતી હોય છે ! આરબોની ભાષાની લઢણ ખ્યાલ બહાર રહી જતાં, તે જાહેરાત નિષ્ફળ ગઈ.

***

From book રસભર્યા કિસ્સાઓ બિઝનેસની દુનિયાના - Vanaraj Malavi

Source: readgujarati.com

કાશીરામ રાણા

પાછલી લોકસભાની ચૂંટણીઓ વખતે કાશીરામ રાણા અમદાવાદના સ્ટુડિયોમાં ટીવી ઈન્ટર્વ્યુ આપવા આવ્યા હતા અને તેમનો મેક અપ ચાલતો હતો ત્યારે જેપી ત્યાં હાજર હતો. મેક અપ મેને જેપીને ખાનગીમાં કહ્યું કે આ માણસ એટલો કાળો છે કે તેનો મેક અપ કયા શેડમાં કરવો એ જ સમજાતુ નથી. ખુદ કાશીરામ રાણા કહે છે કે એક વખત પોતે ટેક્સ્ટાઈલ મિનિસ્ટર હતા ત્યારે એક કાર્યક્રમના સિલસિલામાં દક્ષિણ ભારત ગયા હતા અને ત્યાં સૌ તમિલિયનો તેમને ભેટી પડ્યા અને સાઉથ ઈન્ડિયન સમજીને તમિલમાં વાતો કરવા લાગ્યા. કાશીરામભાઈ કહે છે કે પોતે માંડ માંડ સમજાવી શક્યા કે પોતે દક્ષિણ ભારતીય નથી.




Source: deshGujarat.com/abg

માર્ટિન લ્યુથર કિંગ, ગાંધીજી અને દલાઇ લામા

માર્ટિન લ્યુથર કિંગની પત્નીએ મને એક વાર જણાવ્યું હતું કે, તેમના પતિ સત્ય અને અહિંસાની ગાંધીજીની ફિલસૂફીથી એટલા પ્રભાવિત હતા કે, તેઓ ગાંધીજી જેવા કપડાં પહેરવા ઇચ્છતા હતા.
- દલાઇ લામા ( 11/14/2007)

સરદાર,તિલક અને અંગ્રેજો:શાહબુદ્દીન રાઠોડ

શાહબુદ્દીન રાઠોડ અને મોરારી બાપુ બંનેમાં સામ્ય છે. બંને જણા બોલે ત્યારે વ્યંગ કરે છે, સમકાલીન સમાજનો આયનો બતાવે છે, ખૂબ બધુ વાંચ્યુ હોય એ સરણ વાણીમાં અને બોધપ્રદ રીતે રજૂ કરે છે. મંગળવારે છ નવેમ્બરે ટાગોર હોલમાં આરપાર મેગેઝીન દ્વારા શાહબુદ્દીન રાઠોડની હાસ્યબારસ સંધ્યા હતી. આમાં બકુલ ધોળકીયા, કેડીલાના માલિક શ્રી મોદી, ડીસીપી અભય ચુડાસમા, આજતક ફેમ ધીમંત પુરોહિત આ બધા મોજૂદ હતા. શરૂઆત તો સરસ રહી પણ શાહબુદ્દીનભાઈ જ્યાં થાકે અને વિરામ લેવા બીજા કલાકારને માઈક આપે ત્યાં ઓડિયન્સ ખાલી થતુ જાય.કાર્યક્રમ રાતના સાડા બાર સુધી ચાલ્યો. શાહબુદ્દીનભાઈને અગાઉ બાર વાગ્યા સુધીનુ કહેવાયુ હતુ પણ પછી આયોજકો દ્વારા સવાબાર સુધી ખેંચવાનું કહેવામાં આવતા તેમણે અનિચ્છાએ આગળ ખેંચ્યું અને હોલમાં આયોજકો તરફથી ચાલતો વિડિયો કેમેરો બંધ કરાવી દીધો. ખૈર શાહબુદ્દીનભાઈની આ મહેફિલમાંથી જેપીએ ડાયરીમાં ટપકાવેલી ઢગલાબંધ વાતોમાંથી બે ચાર ચિંતનની વાતો અહીંયા પ્રસ્તુત છે.
- એક વખત સરદાર પટેલ, પુત્રી મણિબેન, સુશીલા નૈયર અને કોઈક ચોથા એમ ચાર જણા બેઠા હતા. આમાંના એકે કહ્યું કે મણિબેન એવા લૂગડા પહેરે છે કે રસ્તા કિનારે ઉભા હોય તો ભિખારી સમજીને કોઈ પૈસો નાખતો જાય. આ સાંભળી સુશીલાબહેને કહ્યુ કે મણિબહેન તો સરદારનું ધોતિયુ ફાટ્યુ હોય એને થીંગડુ મારે અને એ થીંગડાવાળુ ધોતિયુ જૂનુ થાય એટલે એના થીંગડા ઉકેલી પોતાની સાડી પર મારે છે. સરદારે જવાબમાં કહ્યું કે હશે … જેનો બાપ કમાતો ન હોય એની તો આ જ હાલત હોય ને ?
શાહબુદ્દીનભાઈએ કહ્યું કે આવો હતો ભારતનો ગૃહમંત્રી સરદાર. એ સમ્રાટ અશોકથીય વધુ મોટુ રાજ ભોગવનાર હતો. ૫૬૨ દેશી રજવાડા એક કરીને બેઠો હતો પણ એ સરદાર મર્યો તો પાછળ લોખંડની ટ્રંક અને ૨૬૨ રૂપિયા માત્રની મિલકત મૂકીને ગયો હતો. આ વાત જુવાનિયાઓ સુધી પહોંચાડવી જોઈએ કે આવો ય માણસ હતો.(તો લો શાહબુદ્દીનભાઈ અમે દેશગુજરાતના માધ્યમથી આ વાત હજારો જુવાનિયાઓ સુધી અહીં પહોંચાડી દીધી.)
-અંગ્રેજો ભારત પર રાજ કરવા આવેલા ત્યારે ભારતનો સર્વે કર્યો હતો અને તારણમાં કહ્યુ હતુ કે ભારત એવો દેશ છે કે જ્યાં લોકો દેશને નહી પણ પગાર આપનારાને વફાદાર છે.પછી ઈસ્ટ ઈંડિયા કંપની આવી અને ભારત ૧૯૦ વર્ષ ગુલામ રહ્યુ.
-અંગ્રેજોએ આપણા શૂરવીર લડવૈયાઓના શસ્ત્રો ઈંગ્લેન્ડમાં લઈ જઈને મૂકી રાખ્યા છે.શિવાજીની તલવાર અને ગુરૂ ગોવિદસિંહનો ભાલો વગેરે… શાહબુદ્દીને તેમના ઈંગ્લેન્ડ પ્રવાસ દરમિયાન પૂછ્યું કે આ ભારતના શૂરવીરોના જૂના શસ્ત્રો કેમ ઈંગ્લેન્ડ લાવીને રાખ્યા છે તો જવાબ મળ્યો કે કોઈ પ્રજાને બરબાદ કરવી હોય તો તેને તેનો ઈતિહાસ ભૂલાવડાવી દેવાનો હોય છે. આ જૂના શસ્ત્રો જોઈને પણ ભારતના લોકોને કાલે એમની વીરતાઅનો ઈતિહાસ યાદ ન આવે અને શૂરાતન ના ચડે એ માટે તેમને અહીં લાવીને મૂક્યા છે.
-લોકમાન્ય તિલકને અંગ્રેજ કોર્ટે પૂછ્યું કે તમારે માફી માંગવી છે તો તમને જવા દઈશું નહીંતો આંદામાન નિકોબારમાં કાળા પાણીની જેલમાં ધકેલીશું. તો તિલકે કહ્યું હતુ કે માફી માંગીને અહીં મહારાષ્ટ્રમાં રહું તો અહીં જ મારા માટે કાળા પાણી અને માફી માંગ્યા વગર આંદામાન નિકોબારની કાળા પાણીની જેલમાં જઊં તો એ જ મારા માટે મહારાષ્ટ્ર.

Shahbuddinbhai, all time hit... Salute !

Source: deshgujarat.com